BB第一份禮物

咁快BB就有佢第一份禮物，果個人仲要平時只係通過電話，見過一次面既華女，佢就係我地出納部主任，呢個大姐都算係咁。出納部經理只係之前問候過我。

呢個牌子我知道唔平

09年生日

今年生日冇得去旅行，因為妹妹未出世，所以我已經決定左去迪士尼，仲要一定要去，唔理肥仔放唔放到假，如果佢放唔到我都係諗住自己去。近日佢要出排，所以有好野都要等到前一日或果日先知得唔得閒。呢d先煩麻，如果係去旅行死得la，所以我諗住下次去唔同佢去，搵人同我去。

肥仔要返工，我又早起身，上左一陣網，之後再訓多個幾鐘，先出門口。因為肥仔話佢有可能十二點或點幾可以走，我都唔理佢得唔得，我訓醒整好野就自己出發，到我搭車時佢又同我講走得，未去青衣城等，之後出發。因為我要搭迪迪尼既地鐵。

去到隻肥仔鬼鬼鼠鼠咁，話有野送比我，原來係一支好老套紅玫瑰，個盒仲要好DIRTY，明知去玩買支花仲咩，算LA，佢都係想我開心JA。可能係萬勝節關係，都幾多人喎，我好多野都冇得玩，未影相，但影得唔多，都冇咩影。肥仔想玩果D，佢就自己入去玩，我就喺門口等佢，都好過冇得玩，買左少少野，連煙花都冇睇，就走左LU，因為要趁冇咩人搭米奇地鐵，未可以影相，因為去時太多人影唔到。

之後我地就去左扒皇之皇食牛扒，都係一般，點解咁貴，食飽飽，返屋企食蛋糕，唔知點解今年突別想食蛋糕，肥仔話你地D大肚婆口味成日變，好難捉膜，你估做大肚婆咁易，你做?

點都好LA，好謝肥仔老公送支老套既紅玫瑰&倍我去左一個冇得玩既迪迪尼。

 

 

 

影大肚相

終於等到影大肚相，因為攝影師亞joe要星期六﹒日先可以抽空影，我又唔係成日都有星期六日放，所以要時間都係一個問題，又點知佢又會唔會早d出世。d時間都幾緊迫。

我地一早就到apm等佢地一齊上影樓，我地行到一間買鴨仔野shop，之前成日都有行過，因為寫字樓就喺上面，我買左個黑色鴨仔袋，諗住到時出街時袋 d BB野，都幾貴$148，因為佢門口有隻大粉紅色鴨仔，我就問下個SALES可唔可以同隻鴨仔影，佢話可以，我第一時間攞部相機出嚟同佢影 ｌａ~

　

呢間就係我地影既影室 la ，都ok ~

呢d係用自己相機影，唔知亞joe幾時先可以比到相我呢，唔知影成點，如果要影一定要著呢d運動衫，先可影清楚咁影到個肚，唔好著 T -恤，起初諗住每人一件小雲，點知亞Joe話睇唔到個肚，影左幾張就冇影，好彩兩件 T 唔係好貴。

09年中秋夜

一收工就飛的入屯門做節，因為想早d食完飯走，之後同梓源去公園玩燈or螢光棒棒。今年買左個叮噹小巴燈籠，但唔記得影相 tim 。

個月亮又大又圓

同豬丈玩掟螢光圈圈

結婚2週年

咁快又一年，我記得我地上年，係去左一個好無聊既地方世界之窗，因為我地一去到，嘩 ~ 咁多人既，先記得十一國慶，d大陸人放幾日假，所以我地都冇入去，走返屋企，係未好無聊呢！

今年我地又係咁，一早起身都唔知去邊，起初諗住去科學園影相，但一望住個天，都有d想暈，因為係超曬，係想去又想唔去之間，我地又入左沙田，行下宜家，嘆下冷氣先 ~

 呢d梳化要屋企夠大先夠放，我家太細la ~

趁冇咩人，自拍下先

之後我地返去沙田市廣場行下，火車站門口一部氣水機，一扭就結冰既可樂，我地就試下，但我地一買，就將支可樂跌左落地下，仲比人踢左一腳 tim ~ 我地開時都幾驚，驚佢噴晒出嚟，我地都攞定紙巾，一扭無野噴出嚟，咁都好d，佢說明叫我地一開飲一啖，之後扭番埋佢，佢就有冰喺裡面，我地等佢一陣得幾粒冰，難道跌左落地下，就會變成咁，oh ~ 就咁嘥左支冰震可樂 tim ~

面表上冇咩特別既冰震可樂 $10一支

我地上左沙田市廣場頂樓，見到有間甜品店 " 滿記甜品 " ，食左甜品先再行la。唔好食紅豆沙加芝麻糊，d味有d怪怪地。

                        馬豆糕                      芝麻糊加豆腐花              紅豆沙加芝麻糊

頂樓出面，有個公園仔，有d千秋"鄧"，如果唔係咁曬，坐喺度搖下搖，都幾舒服。

夜晚果餐緊係出街食 la，食咩好呢？我話我真係好想食魚生，哈哈 ~ 我終於放監 la ，我地去左一間食日本野既自助餐，$138任食任飲，我緊係第一時間寫幾碟魚生，正 ~ 越唔比你食既野，就自然越想食，仲特別好食 tim ~ 但只得一次，我下次食又唔知幾時，因為我要比bb飲人奶，所以又要戒嚴 la ~

                           兩年前結婚當日                                    兩年後既今日

                           一家兩口加隻狗                       一家三口加隻狗(bb仲未出世)

                               長毛既亞b                                              短毛亞b

我地兩週年紀念又無無聊聊咁過左 lu ，下年三週年，又唔知點過呢，又加多左一個電燈炟。仲有冇得過下二人世界呢？